انا بقي محتارة ومقسومة نصين ومش عارفة اقعد يومين ورا بعض اساند طرف معين..لانه سرعان ما يعمل حاجة تخليني اكرهه واكره كل الاطراف...اذا كانوا بعض من متعصبين الالتراس والمدن الاخري تجاه كل ما هو بورسعيدي...او اذا كان بورسعيدي جاله زهايمر ونسي ان الدم و المأساة والعنصرية اللي بيشوفها علي مدار سنتين كان سببها الاساسي هو مذبحة دبرها العسكر و اشرف عليها الداخلية ونفذها البلطجية في ملحمة عظيمة قتتلت 74 وردة مفتحة!
العصيان المدني في بورسعيد تقريبا اول عصيان مدني ناجح في بلد شايفة ثقافة حتي الاضراب خراب ديار...لاول مرة بنشوف الرأس مالي صاحب المصنع بيتحد و بيقف مع عماله نقس الموقف و يقفل مصنعه بايده و يتظاهرو كلهم سواسية في الشوارع...دة يدل ان طفح الكيل فقلب كل الموازين! ماركس زمانه مستمتع فشخ يا جدع وبيشاور من قبره ويقول اي تولد يو سو يا بهايم..العمال هم الحل...
من الواضح جدا ان الشارع قد ضاق ذرعا من الاخوان...حتي و ان كانوا حتي هذه اللحظة الاكثر تنظيما و قوة علي الساحة الانتخابية اللي كفر بيها الشعب كما كفر بالثورة و الثوار..يعني مش هنختلف اننا مش عايزين الاخوان..ودة لاسباب واضحة وضوح الشمس..حتي اللي انتخبوهم ندموا..مش هاقولك اخواني و مش باحب الاخوان..هاقولك فين وعود النهضة؟ اين خططكم للاصلاح...يا سيدي قدم لي خطة تتحقق في عشر سنين بس قدم لي اي رؤية حتي...بس فنكوش!
مش كل اهل بورسعيد بيطالبوا برجوع العسكر..ومش كل من سكن خارج بورسعيد بيعمم و يظلم ويكره ناسها..لو اهل بورسعيد يتم لومهم علي مجزرة الاستاد..يبقي اهل الدقي يتنفخوا عشان موقعة الجمل..و سكان التحرير تتعملهم ابادة جماعية...اة طبيعي ان غضبهم يظهر دلوقتي اكتر..دي مش انانية..بس من المنطقي ان كل ما زاد الظلم زادت المظاهرات حدة..احنا نفسنا في القاهرة مبننزلش باعداد الا بعد حكم قضائي فاجر او مذبحة عسكرية او اخوانية او او..فاية المشكلة في حراك زايد بعد ظلم؟ من امتي بنخون مبادئنا ونبيع جزء ثائر من بلدنا عشان لنا فيه ذكري اليمة؟ لو بتتقاس كدة مفيش حتة فيكي يا مصر متوجعناش فيها..يالا نهج والله اسهل!
متخونش مبادئك..ولا تخليك مزدوج..اللي بيحصل في بورسعيد من قطع ارزاق الناس بارادة الناس و دم و عنف داخلية وغيره لو كان حصل نصه في اسكندرية ولا المحلة كانت البلد كلها قامت...ازدواجيتكم مش بس غلط...دي كمان خسرت الثورة كتير...فوقوا يرحمكم الله..كفاية انانية.
اما بقي من في بورسعيد يناديى برجوع العسكر لحمايته..احب اقوله...كان نفع نفسه! ولية اساسا بنتكلم علي اساس ان في خلاف بين العسكر والاخوان؟ من امتي؟ من ساعة وثيقة السلمي و غلوشة الاسلاميين في الميدان علي هتافاتنا ضد العسكر واتهامهم لنا في البرلمان اننا بلطجية وطلبهم بتسليح الداخلية ضدنا؟ ولا من ساعة المحاكمات العسكرية؟؟
ولا من ساعة البرلمان و مجلس الوزرا وعماد عفت وعلاء عبد الهادي وكشوفات العذرية وجميع المجازر العسكرية التي تمت الموافقة المتأسلمة عليها؟ اة يانا يا ست البنات! معلش!
ولا من ساعة القلادات و الهروب الامن؟
صدقني الكلمتين دول مش محاولة اقناع مني لك...كلا البتة يا عزيزي..دي مفهاش اقناع..عسكر ميحكمشي دة قرار..مش رأي!
زي ما شفت غدر الاخوان بينا في الاتحادية بعد اعتصامنا السلمي اللي متكسرش فيه كوباية قبل الاشتباكات! زي ما شفت دم الجوهري وابو الحسن بيحني الارض قدامي لمسافة 20 متر في العباسية بعد مجزرة العسكر...
مش عايزين يحكمنا عساكر...ولا واحد بالدين بيتاجر!
يسقط يسقط حكم العسكر...يسقط يسقط حكم المرشد!
اختشوا!!!!
No comments:
Post a Comment